Оқу құралының мазмұндық-құрылымдық жүйесінде өзіндік ерекшеліктер бар. Атап айтқанда, студенттің берілген тақырыптарды саналы әрі сапалы меңгеруі үшін, шетел тілін оқытып-үйретудің дәстүрлі стандарттық әдістемесіне сәйкес, тақырыпқа қатысты лексика, тапсырмалар мәтін алды, мәтін бойынша және бекіту сипатында жүйеленіп берілді. Студенттердің ауызша және жазбаша сауаттылығын дамыту мақсатында нақты лексикалық тақырыпты меңгертетінұтымды мәтіндер сұрыпталып алынды. Мәтіндерді іріктеуде сөздік қорының байлығы,дүниетанымдық мәні, тәрбиелік сипаты, студенттің коммуникативтік, ақпараттық құзіреттілігін дамыту деңгейі басты критерий ретінде назарда болды. Мәтін аясындағы тапсырмаларда студенттерге қазақ тілінің фонетикалық, лексикалық, грамматикалық, стилдік және сөз әдебі нормаларын меңнерту көзделді. Сонымен қатар, әр тақырып көлемінде қазақша ойлап, ойындағысын жүйелі жеткізе алу, сұхбатқа араласу дағдысын жетілдіруге арналған жағдаяттар да мол қамтылды. Тапсырмалар сөйлесім әрекетінің түрлері бойынша шартты белгілермен көрсетілді.